مميزات وعيوب لانسر بومة 

لانسر بومة السيارة ذات الشعبية الأولي في سوق السيارات المستعملة المصري ,  و تعود شعبيتها الي قلة أعطالها بجانب توافر قطع غيارها بأرخص الأسعار و سهولة صيانتها و اتزانها علي الطريق وكل هذا مايبحث عنه كثير من الأشخاص في رحلتهم مع أول سيارة مستعملة  ونستعرض في المقال فئات السيارة و ما تريد معرفته عنها من مميزات وعيوب. 

أولا : مميزات لانسر بومة 
- الاعتمادية لأقصي درجة , تستحمل معاك و اعطالها قليلة ومعروفة . 
- لانسر بومة بالشكل المتعارف عليه نقدر نقول ليها 10 سنين في السوق من 2004 لحد 2014 وده معناه ان قطع غيارها منتشرة في كل مكان وسهل جدا توصلها استيراد وجديد و بأسعار رخيصة . 
- ياباني ثابتة علي الطريق تاخد منها مستوي محترم في الثبات والاتزان . 
- شبابية تقدر تجري بيها وتكون راضي عن ادائها بالموتور ال 1600 سي سي و أقتصادية موفرة معاك في البنزين بموتورها ال 1300 سي سي في الفئات الأخري
 - إعادة بيع ممتازة في أي وقت فكرت تبيع عربيتك لأي سبب هتلاقي 1000 مشتري . 

ثانيا : فئات لانسر بومة 
- موجود أكتر من فئة للانسر بومة اولهم وأاقلهم في الكماليات الكلاسيك بجنوط حديد عادية و بدون فرامل abs أو 2 ايرباج أو فوانيس شبورة للأكصدام الأمامي أو فتحة سقف أو عتب أو سبويلار علي الشنطة . تقدر تسميها (فاضية) من الكماليات . 
- وفئة الهاف سبورت تتميز بأتنين ايرباج و abs  وجنوط سبور . 
- فئة السوبر أكشن أعلي فئة في اللانسر بومة وتتميز بأتنين ايرباج و فرامل abs و جنوط سبور و فتحة سقف و طارة وفتيس جلد و للموديلات القديمة قبل سنة 2010 سبويلر للشنطة الخلفية و عتب . 

ثالثا : فتيس لانسر بومة وأنواعه وتطوره 
- مبدئيا البومة ليها نوعين من المواتير المنتشرين في مصر الموتور ال 1600 سي سي و الموتور ال 1300 سي سي أما في الخارج نزلت بمواتير عزمها أقوي زي موتور 1800 سي سي و موتور 2000 سي سي . 
- الفتيس  ال 1600 سي سي من بداية نزولها وحتي سنة 2009 فتيس CVT ومن بعد 2009 وحتي 2014 نزلت بفتيس ستيبترونك.
- أما الفتيس لل 1300 نزل فتيس عادي 4 سرعات . 
- في أختلاف في العربية بعد موديل 2009 أن السوبر أكشن بدأت تنزل من 2010 بدون سبويلر علي الشنطة وعتب رغم انها اعلي فئة وفيها فتحة سقف . 
- يقال من ملاك البومة ان أفضل موديلاتها 2007,2008,2009

رابعا : عيوب لانسر بومة 
- طابلوه فقير جدا وشكله قديم مابيقدمش أي نوع من الرفاهية , البومة عموما مش هتلاقي فيها رفاهية أكتر من فتحة السقف مافيش بصمة او كاسيت تاتش او أي دلع . عربية جد من الاخر . 
- سمعتها و شعبيتها سلاح ذو حدين و زي ماكان ليهم مميزات في إعادة البيع فا عيبهم في أرتفاع أسعار اللانسر بومة عموما في سوق المستعمل وطبيعي انك تلاقي أسعار مبالغ فيها أو انك تتعب جدا علشان توصل لبومة حالتها محترمة بسعر غير مبالغ فيه . 
- مشاكل متعارف عليها من البومة ( البوابة وحساس الايدل _ تلف عوامة البنزين) .

خامسا : أسعار لانسر بومة 
ادخل هنا هتلاقي كل أسعار لانسر بومة في سوق المستعمل بداية من موديل 2004 وحتي موديل 2014 و متوسط سعر كل موديل 

 الخلاصة : البومة من أفضل السيارات في الاعتمادية وقلة الاعطال و قوة التحمل و هتلمس فيها الياباني المعمر , سيارة عائلية ومناسبة كشبابية , اختيار محترم جدا لو متاح بسعر غير مبالغ فيه خصوصا مع التفاوت الكبير في أسعار المستعمل . 

المقال غير منقول و له كافة حقوق الطبع والنشر وترجع لكاتبه : أحمد فراج 
Ahmed Farrag
كاتب المقالة
كاتب ومحرر اخبار اعمل في موقع Ahmed Farrag Auto .

جديد قسم : قسم تقييم السيارات ( مميزات - عيوب )