أحسن عربيات مستعملة اوتوماتيك من 40 ل 60 الف في مصر


مع الارتفاع الكبير في اسعار العربيات أصبح من الصعب أنك تشتري عربية  مستعملة أوتوماتيك بمبلغ صغير تتعلم عليها وتبدأ بيها  وبتلاقي نفسك قدام اختيار  انك تشتري عربية زيرو تدفع المبلغ اللي معاك مقدم وتدخل في دوامة أقساط مش هتنتهي . 

- هدفي من المقال ده مساعدة كل واحد عايز يشتري عربية مستعملة اوتوماتيك بمبلغ مالي صغير تقضي مشاويره و يروح بيها شغله ويتعلم عليها في البداية عن طريق التوعية بأحسن العربيات المستعملة الأوتوماتيك  الموجودة في الفئة السعرية الصغيرة دي من 40 ل 60 ألف جنيه وتوضيح أهم مميزاتهم وعيوبهم بحيث تعرف أكتر عربية مناسبة ليك . 

أحسن عربيات مستعملة أوتوماتيك من 40 ل 60 ألف 
1- كيا برايد 
2- دايهاتسو كانشيل (الغزالة) 
3- دايهاتسو شاريد 
4- أوبل فيكترا A
5- هيونداي النترا 94-95

اولا : مميزات وعيوب كيا برايد 
قطع غيار موجودة ورخيصة 
عربية أقتصادية و موفرة في البنزين 
اعطالها سهلة وبسيطة أي ميكانيكي بيفهم فيها مش معقدة ومش بتاعت أعطال كتير عموما . 

ثانيا : مميزات وعيوب دايهاتسو كانشيل ( الغزالة) 
عربية صغيرة مناسبة جدا لشاب أو بنت مش لعيلة 
اعطال قليلة وده المطلوب لحد لسه بيبدأ يتعلم علي عربية 
هتقدر تجيبها موديلات 99 و 2000 و 2001 
عربية هتسعفك وتشيلك وتقدر تجيبها حالة كويسة بالسعر ده 
عيبها في قطع الغيار انها مش منتشرة اوي خصوصا لو انت من محافظات لكن تقدر تتغلب علي المشكلة دي انك تدخل جروب الملاك للعربية علي الفيس بوك وتعرف منهم أماكن بيع قطع الغيار وموجودة عند مين ومين أقرب ليك .

ثالثا : مميزات وعيوب دايهاتسو شاريد 
عربية موفرة في البنزين وبردو أعطالها مش كتير وسهلة وواضحة 
اقتصادية عموما معاك مش هتلاقي نفسك بتصرف مصاريف كتير عليها خصوصا اللي بيدور علي عربية في الفئة دي بيكون مهم بالنسباله مصاريفها تبقي أقل حاجة واستهلاكها كمان للبنزين . 
عيبها انها واطية عن الارض شوية لكن ده مش عيب كبير ان في ناس بتعدل عليه وبتعليها او بتتجنب انها تحمل العربية سواء عدد اشخاص زيادة او غيره . 

رابعا : مميزات وعيوب أوبل فيكترا A
عربية الماني يعني هتاخد منها ثبات وشاسيه وصاج قوي وموتور واداء محترم جدا 
مقابل عيوبها ان موتورها 2000 سي سي يعني استهلاك اعلي للبنزين وفيها حساسات اكتر وممكن مشكلة سخونية وكمان لازم تركز انها تكون عربية حالتها كويسة جدا وانت بتشتري 
لازم كمان العربية تروح لحد متخصص فيها مش اي ميكانيكي يشتغلك فيها 
فا العربية هتاخد منها مميزات الالماني في الاداء والثبات و القوة لكن هتدفع ضريبة ده انك هتبعد شوية عن الاقتصادية اللي بنتكلم فيها ومصاريفها هتكون أعلي شوية . 

خامسا : مميزات وعيوب هيونداي النترا موديل 94 و 95 
أكتر عربية عائلية في الترشيحات دي صالونها واسع وميزتها ان سعرها قليل في حدود الخمسينات العربية عيوبها في قطع الغيار انها مش منتشرة والكلام هنا علي قطع الغيار الخارجية مش الداخلية يعني الفوانيس والصاج وخلافه ويعيبها تاني ان الفتيس محتاج محافظة والعربية بتجيب فتيس اوتوماتيك وفي ناس كتير من الملاك بتغيره بفتيس اللانسر و اخيرا يعيبها انها مش منتشرة في السوق وبالتالي اعادة بيعها هتكون مش عالية . 

ده فيديو بالتفصيل عن الفئة دي شوفه وأعرف أكتر عن كل عربية 


كتب المقال أحمد فراج وغير منقول وغير مسموح لأي شخص أو مؤسسة النقل أو الأقتباس الا بالرجوع لصاحبه . 
Ahmed Farrag
كاتب المقالة
كاتب ومحرر اخبار اعمل في موقع Ahmed Farrag Auto .

جديد قسم : أحسن عربية تناسبك

  1. جزاك الله خير وكنت عايز اسألك عن ارخص واحسن عربيه استعمال تنفع لشغل أولى إيه رائيك فى الصينى

    ردحذف
  2. ميزانية حضرتك اد ايه وهقولك انسب عربية للشغل بالميزانية بتاعتك

    ردحذف
  3. معلش ممكن اسال حضرتك الكيا برايد العصفورة موديل 2003 متوسط السعر كام وهل تنصحنى بيها كاول سياره ليا مع العلم مشوارى يوميا مش اقل من 130 كيلو
    وسكرا مقدما

    ردحذف