مميزات وعيوب هيونداي اكسيل 
هيونداي اكسيل من اوائل العربيات اللي انتجتها شركة هيونداي و انتشرت في مصر وحققت نسبة مبيعات عالية ، عربية كانت ناجحة جدا في التسعينات و تعتبر اختيار مميز جدا دلوقتي قدامك لو بتفكر تشتري عربية عائلية اقتصادية بسعر رخيص و رخيص ده بالمقارنة ببطش الاسعار دلوقتي لكل العربيات .
- هيونداي اكسيل نزلت مصر بموتور 1500 cc كربراتير وانجيكشن كان في  المواتير الاستيراد و بموتور 1300cc كربراتير

- الخليجي منها بيختلف عن المصري في الكماليات
الخليجي و الكاملة بتبقي ٤ ازاز كهربا و باور وسنتر لوك و فتح التانك و الشنطة من الداخل و ايريال كهربا و ساعة . علي عكس الفاضية بيبقي فيها باور و تكييف فقط . و في الغالب بتبقي ال ١٥٠٠ هي الكاملة .
وعلشان تعرف الخليجي هتلاقي لوحة سودة موجودة علي القايم الشمال بتاع باب السواق مكتوب فيها ان السيارة مطابقة للمواصفات الخليجي .
- الاكسيل بتنزل مانيوال بفتيس اربع و خمس سرعات و بفتيس اوتوماتيك اربع سرعات اللي مشاكله كتير واحسنهم و اكثرهم عملية الفتيس المانيوال ٥ سرعات .
_ واخيراالعربية موجود منها الهاتشباك والسيدان . 

مميزات هيونداي اكسيل : 
١- عربية عائلية و بتتميز بصالون واسع بيدي مساحة للركاب في الخلف و شنطتها كبيرة .
٢- قطع غيار رخيصة
٣- صيانة و تصليح سهل اي صنايعي يفهم فيها مش معقدة .
٤- العربية ناعمة جدا بشهادة ملاكها .
٥- لما تيجي تبيع العربية هتبيعها بسرعة و مش هتخسر كتير من تمنها مناسب. بسبب الاقبال عليها من حد لسه بيركب عربية اول مرة و اقتصادية استهلاكها للبنزين و قطع غيارها الرخيصة .

 عيوب هيونداي اكسيل : 
١- انك هتشتريها موديل التسعينات طبعا و العربيات عموما سلعة استهلاكية مش معمرة لكن في رينج السعر اللي بنتكلم فيه هي افضلهم فا وانت بتشتري تحاول تاخد عربية مش متهانة ولا فيها بارومة ومتحافظ عليها قدر المستطاع .
٢- شاسيه العربية ضعيف وبيشرخ و صاجها ضعيف و عفشتها محتاجة منك تاخد بالك في النقر و المطبات علي اد ماتقدر خصوصا ان العربية واطية للارض و مش عايزة منك تحملها دايما وتيجي عليها .
"الخلاصة"
الاكسيل تعتبر من افضل العربيات العملية والاقتصادية في فئتها السعرية خصوصا انها هتشتغل معاك ببنزين ٨٠ مش هتقول لاء وتعتبر مناسبة جدا لواحد عايز عربية يبدأ بيها و يتعلم عليها و بعد كده لما ربنا يكرمه يبيعها ويجيب الاحسن . المهم تحاول وانت بتشتري تاخد عربية حالتها كويسة وصاحبها ماكنش بيهينها علشان ماتتعبكش وتدخل في دوامة اعطال .
 متوسط سعرهيونداي اكسيل في السوق : 
من ٤٥ الف ل ٥٥ الف للمانيوال حسب الحالة و الموديل.
ومن ٦٠ ل ٦٥ للاوتوماتيك حسب الحالة و الموديل.
ملحوظة 
المقال غير منقول كتبه "احمد فراج" و تعود اليه كافة الحقوق في الطبع والنشر وأي نشر للمقال تحت أي مسمي يعتبر أنتهاك لتلك الحقوق .
Ahmed Farrag
كاتب المقالة
كاتب ومحرر اخبار اعمل في موقع Ahmed Farrag Auto .

جديد قسم : قسم تقييم السيارات ( مميزات - عيوب )