مميزات و عيوب كيا كارينز الشكل القديم


 تقرير كامل عن كيا كارينز الشكل القديم يعني موديلات لحد 2013 كاتبه بنفسي مش منقول من أي مكان و بناء عن تجربة شخصية للعربية موديل 2012 لمدة سنة ونصف . هشرح مميزاتها وعيوبها وأسعار قطع الغيار و ثبات وهتلاقي إجابة لكل سؤال بيدور في دماغك عن العربية .

أولا : مميزات كيا كارينز الشكل القديم 
- أول ميزة في العربية هي الصالون الواسع جدا  , عائلية من الدرجة الأولي .. أي سفر هي اللي بتقوم بيه خصوصا أننا أسرة  6 أفراد بتشيلنا  أحنا والشنط بتاعتنا , واللي بيبقي قاعد ورا كمان بيبقي مرتاح لأن المسافة بين الكنبة والكرسيين اللي قدام كبيرة خصوصا أني ببقي مرجع  كرسي السواق للأخر . 

- العربية أعتمادية جدا جدا أعطالها قليلة مش محتاجة منك غير الصيانات الدورية تغيير زيت و فلاتر و سيور و تظبيط عفشة .. غير كده ماتلاقيش منها أعطال معقدة ممكن  تظهر في عربيات تانية .
- شكلها جميل و بتديك برستيج محترم خصوصا انها بين الكروس اوفر والهاتشباك .
- ثابتة جدا معايا علي الطريق في السفر و بكون واثق جدا مش قلقان وتشجعك تجيب بيها اكتر. 

- الكارينز بتنزل فئتين 
- الفئة الثانية يميزها إيرباج الطار و الطابلوه  و abs  و إشارات في المرايات ونواكل في الأبواب وتحكم للطارة وشاشة صغيرة للتكييف. 
العربية بينزل منها الفتيس  المانيوال والأوتوماتيك وبتكلم هنا أكتر علي الفتيس الأوتوماتيك من خلال تجربتي مافيس منه أي مشاكل. 

ثانيا : عيوب كيا كارينز الشكل القديم 
- أول عيب في العربية ويمكن ده أكبر عيب فيها هو أن موتورها 1600 سي سي وطبعا الجسم الخارجي للعربية كبير غير وزنها طن ونصف فاضية بالتالي العربية السحب بتاعها وحش ومش بتاعت جري ده خلي العربية بتنزل في الخليج 2000 سي سي  وبيبقي الموتور مناسب جدا ليها لكن نزلتلنا 1600  .. فا عايزة اللي يركبها يبقي عاقل في سواقته ومابيحبش يجري بالعربية ويشد وياخد غرز .

_ تاني عيب وهو مش عيب كبير ولكنه شائع جدا جدا هو أن لوك الابواب ضعيف وبتلاقيه خرب بسرعة وتيجي تقفل لوك العربية تلاقي الأبواب مش بتقفل و تفتح مع اللوك  ولازم تعملها بإيدك .. والحل انك بتروح عند صنايعي بتاع أبواب بيغيرلك الأربع قرب الواحدة ب 150 جنيه وبتنساهم بعد كده .

_ تالت عيب وده أنا عاصرته وماكنتش أعرفه عن الكارينز قبل كده هو أن العربية واطية عن الأرض رغم أن شكلها يوحي بغير كده ويمكن ناس كتير هتستغرب العيب ده 
لكن لما يركب عدد معايا أو بكون محمل فيها حاجات تقيلة  و تلاقي مطب من المطبات المعمولة غلط تلاقي العربية بتخبط منك و تاخد المطب بالعرض . والحل ان في ناس بتروح عن حد بتاع عفشة تركب علايات . 

_ رابع حاجة عفشة العربية ناشفة شوية وبتحس بالنقر والمطبات و دي حسيتها أكتر لما ركبت عربيات تاني ولقيت نفس النقر والمطبات مش حاسس بيها تماما زي سيراتو الشكل الجديد أو بومة سوبر أكشن 2012 .

_ الأستبن بتاع العربية مش جنط لكنه حاجة بديلة مؤقتة ومابيعديش سرعة 80 تركبه لحد أقرب مكان بتاع كاوتش . 

_ كشافات العربية لما تشغل الواطي والعالي النور مش قوي زيادة انه يكشفلك الطريق قدامك وخصوصا لو علي طريق سفر مافهوش أعمدة نور .. فا هتحتاج تعدل في النور وتجيب لمبات ليد أو تركب زينون 

ثالثا : أستهلاك البنزين  ل كيا كارينز الشكل القديم 
العربية أستهلاكها كويس جدا معايا في البنزين بتعمل 550  كيلو تقريبا  للتفويلة و بتعدي الرقم ده  لو علي طريق سفر. وأي حد معاه العربية وتلاقيه  يشتكي من أستهلاك البنزين يبقي العيب عنده في عربيته لأن في حاجات لو ماتظبطتش تزود أستهلاك العربية للبنزين زي حساس الشكمان . 

رابعا : أسعار قطع الغيار والصيانات لكيا كارينز الشكل القديم 
العربية أولا صياناتها الدورية زي الفلاتر والبوجيهات و السيور .. أسعارهم كويسة جدا زيها زي باقي العربيات في فئتها خصوصا بيركب عليها نفس الحاجات لان موتورها هو موتور السيراتو 
أما قطع الغيار الخارجية استيراد  زي الفوانيس والاكصدامات و الابواب أسعارهم متوسطة ومعقولة جدا المهم تعرف تروح لمين بتاع قطع غيار استيراد يبقي كويس في أسعاره .يعني مثلا زجاج الباب الفاميه عندي اتكسر بسبب طوبة جبته أصلي فاميه استيراد ب 200 ج
سعر كيا كارينز الشكل القديم في السوق دلوقتي 
تقدر تجيبها موديلات 2012 2013 أعلي فئة أوتوماتيك و تبقي حالتها كويسة و ممكن كمان فابريكة كلها بمبلغ من 220لف ل 240ألف ولو أول فئة 210 لو فابريكة و ركز أنك تجيب عداد مش كبير وانت بتشتري . 
الخلاصة : 
عايز عربية واسعة جدا من جوه عائلية تشيلك انت وأسرتك إعتمادية مش بتاعت أعطال ,  شكلها حلو سواء الشكل الخارجي من بره أو الصالون من جوه .. ثابتة معاك علي الطريق ومش بتاع انك تشد وتجري الكارينز هتبقي مناسبة جدا ليك . 

جميع حقوق النشر محفوظة لكاتب المقال
 أحمد فراج 
Ahmed Farrag
كاتب المقالة
كاتب ومحرر اخبار اعمل في موقع Ahmed Farrag Auto .

جديد قسم : قسم تقييم السيارات ( مميزات - عيوب )

  1. بصراحه انا قمت اولا برفع الصندوق اللي في الشنطه واحضرت 2 كرسي اصلي من بور سعيد علشان العربيه نزله بالخليج 7 راكب وكلفني الامر 2500 جنيه وقمت بتركيب سوست كيا اسبورتاج وارتحت من المطبات الموضوع كله كلف 3500 جنيه

    ردحذف
    الردود
    1. في تجربة كرسيين خلفيين غيرت الكنبة الوسطى وفبر الشنطة؟؟

      حذف
  2. بصراحه انا قمت اولا برفع الصندوق اللي في الشنطه واحضرت 2 كرسي اصلي من بور سعيد علشان العربيه نزله بالخليج 7 راكب وكلفني الامر 2500 جنيه وقمت بتركيب سوست كيا اسبورتاج وارتحت من المطبات الموضوع كله كلف 3500 جنيه

    ردحذف
    الردود
    1. جديد موضوع سوست الاسبورتاج ده لكن التجربة عموما مع حضرتك ايه هل في اي عيوب
      هو في ناس بتركب علايات

      حذف
  3. و الكنبة التانية فعلا ممتازة جدا و بتكون بالفبرتين كمان بتوعها ورا بتوع الجنبين

    ردحذف
  4. مقال محترم جدا بالتوفيق

    ردحذف
  5. في خطوه انت ناسيهه هي مكيف الكيا كارنز ضعيف يجي قطعتين فقط ومش كويس ضعيف مع علم سياره 7راكب

    ردحذف
    الردود
    1. العربية في مصر كلها 4 راكب و ال 7 راكب منها بيبقي متعدل
      التكييف يعيبه فعلا انه مالهوش فتحات تكييف ورا لكن دي كمان بتتعدل و بيركب الكنسولة الاوروبي او الخليجي ليها فتحتين تكييف ورا فا لو حد هيعدل عليها ويزود كنبة وتبقي العربية 7 راكب من باب اولي يعدل كمان الكنسولة ويزود فتحات التكييف وهنا هتبقي اتحلت المشكلة

      حذف
  6. تسلم على المعلومة

    ردحذف
  7. طب الفئه الاولي السنتر لوك ليه رمود

    ردحذف
    الردود
    1. مالهوش ريموت لكن ممكن تركب للعربية ريموت و تنقل السلاح والفحمة في مفتاح بريموت عملت مفتاحين غير مفتاحها الاصلي و كلفوني بالتركيب و جهاز الانذار وكل حاجة ٧٠٠ ج

      حذف
  8. جزاك الله خيرا مقال رائع لكن ما رايك في كيا سول عندما تقارنها بكيا كارينز

    ردحذف
  9. جزاك الله خيرا مقال رائع لكن ما رايك في كيا سول عندما تقارنها بكيا كارينز

    ردحذف
  10. جزاك الله خيرا مقال رائع لكن ما رايك في كيا سول عندما تقارنها بكيا كارينز

    ردحذف
  11. جزاك الله خيرا بصراحة أستفدت من المقال

    ردحذف